Мембраналық дистиляция процесiне арналған тректi мембраналарды кремний нанобөлшектерiмен түрлендiру

Abstract

Ұсынылып отырған жұмыста арнайы полиэтилентерафталаттан жасалған тректi мембраналарды түрлендiруге арналған зерттеу жұмыстары келтiрiлген. Түрлендiрiлген мембраналар мембраналық дистиляция процесiнде қолданылады. Салааралық ғылыми зерттеу кешенiндегi зертханалық жағдайда триэтоксивинилсиланнан кремнийдiң әр түрлi өлшемдi нанбөлшектерi арнайы "төменнен жоғары" әдiсiмен синтезделдi. Беттiк активтi зат ПАВ (поверхностно активное вещество) лаурилсульфитнатрий мен поливинилпирролидон (ПВП) қоспаларының кремний нанобөлшектерiнiң өлшемдерiне әсерi зерттелдi. Нанобөлшектердiң синтезiнен кейiн беттiк активтi заттар әр түрлi спирттермен экстрацияланды. Алынған нанобөлшектер полиэтилентерафталаттан жасалған, химиялық өңдеуден өткен, нанокеуектi тректi мембрананың бетiне иммобилизацияланып, нәтижесiнде ылғалдың беттiк жанасуы бастапқы θ = 45◦ тан θ = 125◦ ға дейiн айқын ұлғайды. Мембраналық дистиляция процесiнде гидрофобты мембраналар маңызды орынға ие. Түрленген тректi мембраналар ИҚ-спектроскопия (инфрақызыл), сканерлеушi электронды микроскоп (СЭМ), ылғалдың беттiк жанасу бұрышының өзгерiсi әдiстерiмен зерттелдi.