ӘЙЕЛДЕРГЕ ҚАТЫСТЫ КЕМСІТУШІЛІКТІ ЖОЮ КОМИТЕТІ

Abstract

Әйел - жаны нәзік, болмысы бөлек, солай бола тұра мойнына артылған ауыр жүктерді арқалай жүріп, өмірлік міндет етілген қызметтерін атқара білетін жаратылыс. Қоғамның бөліктері ретінде еркек, әйел және бала қарастырылады. Осының ішінде әйелдерді қанап, билеу, күң етіп қорлау, сөзін елемей, ісін өндірмей ‘өмірін’ тас-талқан еткен заманның қай елдің тарихында болмасын орын алғандығы барлығымызға аян. Бейбіт елдерде әйел болмысы тапталмауын қадағалайтын Әйелдерге қатысты кемсітушілікті жою Комитеті бар екендігін, оның жұмысының нәтижесімен таныса отырып, ары қарай мемлекет ретінде қолдау танытуды алға тарту біздің негізгі мақсатымыз. Әлі де жер шарының түкпір-түкпірінде әйелді адам есебіне қоспай жүрген ұлт немесе ұлттың ішіндегі топтар бар болуы мүмкін. Солардың ойын жоққа шығарып, әр жаратылыстың орны бар екендігі мойындалуы қажет. Орын алған әйелдерге қатысты кемсітушілік жағдайы болса, оның дұрыс шешіммен қорытындылануы тиіс.