Аннотации:
Ең үздік әлемдік тәжірибелерге сүйенетін болсақ, цифрлық қоғамды қалыптастыру үшін, ең алдымен кәсіптік білім беру жүйесін жаңартудың қажеттілігі туындайды. Бүгінгі күнде, кəсіптік білім берудің бүкіл жүйесін еңбек нарығында сұранысқа
ие құзыретті мамандар қалыптастыруға бағыттау маңызды. ХХІ ғасырда болашақ
маманның бойынан талап етілетін кәсіби маңызды сапалар мен құзыреттіліктерге: жаһандық деңгейде ойлана алу, цифрлық сауаттылық пен цифрлық құзыреттілік,
үздіксіз түрде білім алу, креативтік міндеттерді орындау және т.б. жатқызуға болады.
Цифрлық құзыреттілік болашақ маманның ақпараттық-коммуникативтік технологияларды цифрлық ортада жайлы өмір сүру үшін, қоғаммен өзара әрекеттесу және кәсіби қызметте цифрлық міндеттерді орындау үшін пайдалана білу қабілеті. Жоғары оқу
орны жағдайында болашақ мамандардың цифрлық құзыреттіліктерін қалыптастыруға
бірқатар факторлар әсер етеді және цифрлық құзыреттіліктің тиімді қалыптасуы
үшін осы факторлардың ескерілуі маңызды.
Мақала мазмұнында жоғары білім беру жүйесін цифрландыру бойынша мемлекеттік
бағдарламалар негізінде іске асырылып келе жатқан жұмыстарға талдау жасалды. Цифрлық құзыреттілік түсінігінің мәні мен мазмұны нақтыланып, ЖОО-да болашақ
мамандардың цифрлық құзыреттілігін қалыптастыруға ықпал ететін сыртқы және
ішкі факторлар айқындалды. Сауалнама және әңгімелесу әдістерінің көмегімен болашақ
мамандардың цифрлық құзыреттілігінің қалыптасуына әсерін тигізетін сыртқы және
ішкі факторлар бойынша зерттеу нәтижелері алынды. Педагогикалық мамандықтағы
студенттерден алынған сауалнама нәтижелері цифрлық құзыреттілікті ЖОО-да қалыптастыру бойынша маңызды қорытындылар жасауға мүмкіндік берді.
