Аннотации:
Мақалада PISA халықаралық зерттеудің негізгі бағыттарының
бірі оқу сауаттылығы қарастырылған. Оқу сауаттылығы өлшемдері, оны
бағалаудағы аспектілер (материалдың форматы, тапсырмалар түрі, мәтінді қолдану мақсаты), оқу сауаттылығы бойынша тапсырма ерекшеліктері,
оқу түрлері және оның ережелері туралы жан-жақты түсіндіріледі. Оқу сауаттылығының құрамдас бөліктері – жағдаят, мәтін, аспект турасында сөз
қозғалады. Жағдаяттың санаттары (жеке пайдаланым үшін оқу, көпшілік
пайдаланым үшін оқу, білу үшін оқу және оқыту үшін оқу), мәтін нысандары
мен түрлері, аспект салалары (Мәліметті табу. Кеңінен ұғыну. Интерпретациялауды дамыту. Мәтін мазмұнын көрсету, бағалау. Мәтін формасын көрсету)
бағытында мағұлмат беріледі. Автор мәтінді түсіндіру үшін қолданылатын
«интерпретация» және «герменевтика» ұғымдарына тоқталады. Оқу және
оқыту процесінде сұрақтарды дұрыс қоюдың, оның мазмұнын түсініп, талапқа сай жауап берудің маңызы зор. Мақаладан осы мәселелердің жіктелуі туралы ақпарат табуға болады.
Оқырмандардың оқуға деген қызығушылығын ынталандыруда ресурстар
мен мәтінді таңдаудың, тапсырманы түрлендірудің өзіндік мәні бар екендігі
дәлелденеді.
Сонымен қатар мақалада білім алушыларға оқылымды үйрету әдістемесінің ерекшеліктері, оқу сауаттылығын арттырудағы тиімді әдіс-тәсілдері
қарастырылған. Ғалымдар зерттеулерінен мысалдар келтіріліп, практикалық шешімдері басшылыққа алынған. Автор оқылымның әдіс-тәсілдерін
ұсынып, дұрыс жүргізу техникасын баяндайды. Отандық, ресейлік және шетелдік зерттеушілер қисындарының негізгі идеясы талқыланады.
