Abstract:
Бүгінгі таңда мектеп бағдарламасында элективті курстарды енгізу
оқушылардың білімін тереңдетуге және олардың қызығушылығын арттыруға бағытталған
маңызды қадамдардың бірі болып табылады. Осы зерттеуде «Жаңа заттар мен материалдарды
өндіру» элективті курсын мектеп бағдарламасына енгізудің тәжірибесі қарастырылды.
Зерттеудің мақсаты – элективті курс арқылы оқушылардың білім деңгейінің өзгеруін талдау
және оның тиімділігін бағалау. Бұл мақсатқа жету үшін салыстырмалы талдау, сауалнама және
эксперименттік әдістер қолданылды. Курс бағдарламасы оқушыларды заманауи материалтану
ғылымының негіздерімен таныстыруға, жаңа заттарды өндіру технологияларын меңгеруге
және олардың химиялық қасиеттерін зерттеуге бағытталды. Зерттеу барысында басқа
мемлекеттердің тәжірибесі талданып, олардың элективті курстарды енгізу әдістері
қарастырылды. Оқушылардың бастапқы және қорытынды білім деңгейі салыстырылып,
элективті курс білім сапасына әсер ететіндігі анықталды. Нәтижелер көрсеткендей, курсқа
қатысқан оқушылардың теориялық білімі мен практикалық дағдылары айтарлықтай
жақсарды. Зерттеу қорытындылары элективті курстардың мектептегі білім беру жүйесіне оң
ықпал ететінін көрсетеді. Болашақта осындай курстарды одан әрі жетілдіру үшін оқыту
әдістемелерін инновациялық технологиялармен толықтыру ұсынылады.
