Телевизиялық дискурс прагматикасы

Abstract

Мақала телевизиялық дискурстың прагматикалық табиғатын тану бағытына арналып, нақты нысан ретінде таңғы бағдарламалар зерттеуге алынды. Ғылыми-техникалық ілгерілеу алға басқан сайын қоғамдық қатынастар да күрделене түседі, ақпараттар легінің жылдам, нақты, қысқа, әрі шынайы болуы – медиа саласының басты талабы. Бүгінгі медиа саласының дискурстық табиғаты адресант-мәтін-адресат үштігі аясында прагматикалық мақсаттарға бағытталады. Телевизиялық дискурстың прагматикалық табиғатын тануға арналған зерттеу мақала антропоөзектік парадигма қағидаларына орай тілді адамның санасы мен танымы, рухани құндылықтары әлемі негізінде тұтас алып қарастыруды мақсат етеді. Зерттеу мақала таңғы ақпаратты бағдарламалардың берілу форматындағы жаңашылдықтарын тануға, прагматикалық мақсаттарын (стратегия мен тактика) нақтылауға бағытталды. Коммуникация барысындағы адресант – адресат арасындағы өзара байланысты бағамдауда тележүргізушінің кәсіби шеберлігі (сұрақ қою шеберлігі) мен тікелей эфир мәдениетін меңгеру деңгейлерін ескере отырып адресант пен адресаттың аялық білімі мен танымы т.б. мәселелерін қарастыру міндеттері қойылды. Телевизия дискурсындағы бағдарламаларды антропоөзектілік парадигма аясында қарастыру теориялық тұрғысынан қажет болады. Телевизиядағы сөйлеу әрекеті, қоғамдағы сөйлеу мәдениетін қалыптастыратыны белгілі. Сондықтан телевизия мүмкіндіктері мен қолданысына назар аудару мен экран мәдениетін меңгеру практикалық тұрғыдан құнды. Тілді адамның санасы мен танымы, рухани құндылықтары әлемі негізінде тұтас алып қарастырудың маңыздылығы зор болмақ.