Аннотации:
Бұл мақалада автор цифрлық кеңістікте адам мен қоғамның өзара қарым-қатынасынан туындайтын гуманитарлық проблемаларға ғылыми коммуникация қандай дәрежеде жауап беруі тиіс деген мәселені анықтауды мақсат етіп алған. Зерттеу жұмысының ғылыми және практикалық құндылығы деп ғылыми коммуникацияның әртүрлі кезеңдері мен сипаттарының анықталып, даму заңдылықтары мен жылдамдығының өзара байланысының көрсетілуін атауға болады. Зерттеу әдістемесіне бақылау және салыстыру, сипаттау сияқты тәсілдермен қатар, құжаттарды жүйелеу және социометриялық әдіс-тәсілдер қолданылды.
Автор мақаласында өндірістік революция, ғылым мен техниканың прогресіне деген сенім ғылыми коммуникацияға деген сұранысты күшейткенін көрсетеді. Ғылыми жаңалықтарды өндірісте қолдануға деген іскерлік атмосфераның қалыптасуына ғылыми коммуникацияның әсері күшті болған деген тұжырым жасайды.
Қазақ ғылыми журналистикасының бүгінгі деңгейіне баға беру, болжамдар жасаудың қиындығын автор зерттеу жұмысының қорытынды нәтижелерінде ескертеді. Оларды автор ғылыми журналистиканың ағартушылық бағыты мен ғылымның қоғамдағы беделінің төмендігімен, ғалымдардың мемлекеттік қолдаудан тыс қалғанымен түсіндіреді. Халықаралық тәжірибе көрсеткендей, қоғамның инновацияға, жаңа идеяларға деген ұмтылысын күшейту үшін мемлекеттің жүйелі қолдауының қажеттігі туралы қорытынды жасайды.
